Ուրեմն․
Երեկ տեղի ունեցավ Հայաստանում առաջին հոգեբանական չկոնֆերանսը՝ psycamp֊ը։
Ուզում եմ ասել, որ psycamp֊ը իր ներկայացումներով ավելի մոտ էր իր անվանմանը, կամ, կարելի է նույնիսկ ասել, որ շեղումներ չկային հոգեբանական թեմաներից։ Այսինքն բարքեմփին «դեսից դենից» «ծիծաղի տուն» ներկայացումները շատ են լինում, իսկ այս տարվա psycamp֊ին չկային։ Գուցե դեռ առաջին տարին է, ու գովազդա֊հումորա֊դատարկաբանները դեռ չեն հայտնաբերել նոր բեմը, ինչեւէ։
ԵՊՀ֊ի մթնոլորտը այնքան էլ համապատասխան չէր միջոցառման ֆորմատին, բայց ամեն դեպքում, ներկայացումներն ու մարդիկ փոխեցին ամեն ինչ։
Իսկ վերջում ելույթ ունեցող Բեյրութից ժամանած հայ հոգեբանից իմացա, որ լուսնոտներին կարելի է արթնացնել։ Նա շատ լավ էր դա ասում արեւմտահայերեով՝ «ավելի լավ է մարդ վար ընկնի պատուհանեն, քան տրաումա հասցուցանե՞ս» (ես կանոնները չկարողացա լրիվ պահեմ, բայց մոտավորապես սենց ։Դ)։
Բայց ամենակարեւոր բանը, որ ես հասցրեցի ֆիքսեմ ինձ համար, այն էր, որ հոգեբանությունը, դրա տեսությունը հաճախ ակնհայտ է լինում, օրինակ, շատ դեպքերում ինձ համար։ Ասենք շատ բաներ ինձ պետք չի կարդալ, պետք է մի տաս րոպե մտածես, որ հասկանաս, թե մանիպուլյացիա ով կարող է անել, ինչ նպատակով + մի քիչ էլ քո ու ուրիշների կյանքից փորձ + գրականություն (գեղարվեստական) հանդիպած օրինակներ, ու ամեն ինչ իր տեղն է ընկնում։
Ու, կարծում եմ, հենց սա է պատճառը նրա, որ մեր հասարակությունը հոգեբաններին մի տեսակ են վերաբերվում, էլ չեմ ասում հոգեբանների ծառայություններից օգտվողներին։
Նկատի ունեմ, որ այն չիմացությունը հոգեբանությունը հոգեբուժության հետ խառնելու, ու ասելը «գիժ եմ , ինչ եմ, գնամ հոգեբանի մոտ», դա մի կողմն է միայն։ Մյուս կողմը, ավելի գրագետ ու խելացի մարդիկ են, ովքեր կարդացել են հոգեբանների մի քանի գիրք, կամ մի երկու տեսության են ծանոթացել, ու այդ տեսությունները նրանց հեշտ են տրվել, ակնհայտին շատ մոտ, այդ պատճառով հոգեբաններին թերահավատորեն են մոտենում, ու մտածում՝ դե ես էլ եմ հասկանում։
Բայց, հոգեբանության գեղեցկությունը, իմ կարծիքով նրանում է, ո ր հասկանալ տեսությունը չի նշանակում, որ դու կկարողանաս ինչ֊որ մեկին օգնել, կամ ինքդ քեզ օգնել։ Օրինակ, մաթեմատիկայում եթե դու գիտես տեսությունը, շատ դեպքերում, դու կարող ես գործնականում այն կիրառել, իսկ հոգեբանության պարագայում դա մի փոքր այլ է։
Նկարները վաղը ։Ճ
Չվհատվող 